ETOPAZ 
Azarenkonun 41-ci finalı
İndian-Uellsdə keçirilən qadın tennisçilərin turnirində finalçılar bəlli olub. İspaniyalı Paula Badosa yarımfinalda Ons Jaberə qalıb gəlib – 6:3, 6:3.
23 yaşlı tennisçi “Top-20”dəki rəqibləri üzərində 10-cu qələbəsini qazanıb. Bunların hamısı 2021-ci ilə təsadüf edib.
Badosa karyerasında ikinci, “WTA-1000” səviyyəli turnirdə ilk dəfə finala yüksəlib. O, bu uğur sayəsində “Top-20”də yer alacaq.
Paulanın rəqibi dünyanın sabiq birinci raketkası Viktoriya Azarenko olacaq. Belaruslu yarımfinalda Alyona Ostapenkonu məğlubiyyətə uğradıb – 3:6, 6:3, 7:5.
O, mövsümdə ilk, karyerasında 41-ci dəfə finala yüksəlib. Azarenko bunların 21-də titul qazanıb. 2012-ci və 2016-cı illərdə İndian-Uellsdə qalib olan tennisçi 3-cü dəfə bu turnirin həlledici matçında oynayacaq. O, finalda qalib gəlsə “Top-20”, uduzsa “Top-30”a qayıdacaq.
