ETOPAZ 
10 tennisçi Çikaqoda oynamaqdan imtina etdi
Çikaqoda keçiriləcək WTA-500 turnirində iştirak etməli olan 10 tennisçi fikrindən daşınıb. Onlar yarışda iştirakdan imtina ediblər.
Bu tennisçilər arasında “Top-10”a daxil olan üç raketka da var. Dünya reytinqinin ikincisi Arina Sobolenko, üçüncüsü Karolina Plişkova və yeddinci sırada olan Sofiya Kenin Çikaqoda korta çıxmayacaq. Kori Qauff, Darya Kasatkina, Sorana Kırstya, Petra Martiç, Hizer Uotson, Yohanna Konta və Yelena Vesnina da turnirdən imtina edib.
Onları əvəzləyəcək tennisçilər də bəllidir. Bunlar Sloun Stivens, Andrea Petkoviç, Enn Li, Kayya Kanepi, Amanda Anisimova, Medison Brenql, Mariya Kamila Osorio Serrano, Su-Vey Se, Mari Buzkova və Aleksandra Sasnoviçdir.
Sentyabrın 27-dən oktyabrın 3-dək davam edəcək turnirin reytinq favoriti 4-cü raketka Elina Svitolinadır.
Yarışda “vild card”la Anjelik Kerber və Kim Kliysters də mübarizə aparacaq.
