ETOPAZ 
Tedesko: “Onların heyətində Ramil Şeydayev kimi futbolçu var”
AVRO-2024-ün seçmə mərhələsinin sabah keçiriləcək Azərbaycan – Belçika oyunundan əvvəl qonaqların baş məşqçisi Domeniko Tedeskonun mətbuat konfransı baş tutub. 37 yaşlı mütəxəssis sabahkı qarşılaşma və Kevin de Bruynenin yoxluğundan danışıb:
“Kevin De Bruyne sabah olmayacaq. Onu birbaşa əvəzləmək mümkün deyil. “Mançester Siti” kimi bizim üçün də eyni vəziyyətdir. Kollektiv şəkildə oynayaraq onun yoxluğunu hiss etdirməməliyik. Həmin mövqedə oynayan oyunçu da düzgün anda, düzgün qərarlar verməlidir. Kreativliyi də çox önəmlidir. Açığı, həmişəkindən daha çox gərginəm. Müsahibələri oxuyuram, artıq çoxları deyir ki, Avropa çempionatına vəsiqəni qazanmışıq. Bu, düzgün deyil. Mənim stilimdə olmayan bir şeydir.
Oyunçulara da deyirəm ki, doğru deyil, biz oyunlara köklənməliyik, qalib gəlməliyik. Azərbaycan millisini təhlil etmişik. Doğrudur, İsveçə 0:5 uduzublar. Amma girib detallara baxanda, Azərbaycan ilk yarıda daha çox topa sahib olub. Bir qol vursaydılar, başqa cür alınardı. Sabah Azərbaycan hesabda 1:0 hesabı ilə önə keçsə, hər şey başqa cür olacaq. Onların heyətində Ramil Şeydayev kimi futbolçu var ki, istənilən klubda oynaya bilər. Mentalitet çox önəmlidir ki, nəticəni əldə edəsən”.
