ETOPAZ 
Qurban Qurbanov: “Əlimizdən gələni edəcəyik”
“Qarabağ”ın baş məşqçisi Qurban Qurbanov Avropa Liqasının qrup mərhələsinin püşkatmasını dəyərləndirib. 50 yaşlı mütəxəssis G qrupuna düşən komandanın şansları barədə fikirlərini açıqlayıb.
Qurbanov “Olimpiakos”, “Frayburq” və “Nant”ın yer aldığı qrupda hər komandanın iddialı olduğunu bildirib: “İddialı bir qrupa düşmüşük. Birbaşa görünür ki, hər bir komandanın böyük şansı olacaq. “Frayburq”, “Nant” “böyük beşlik” ölkələrində çıxış edir. “Olimpiakos” da həmişə iddialı olub. Rəqiblərlə yaxın günlərdə tanış olacağıq. Onlara yaxından bələd olmaq, hər birinə qarşı düzgün hazırlaşmaq üçün maksimum çalışacağıq. Əgər istənilən komanda üzərində yaxşı nəticə əldə etmək şansımız varsa, bundan maksimum istifadə edəcəyik. İnanıram ki, bizi qarşıda çox maraqlı oyunlar gözləyir. Fərqli oyun sistemlərinə qarşı çıxış edəcəyik. Onlara qarşı yaxşı oyun sərgiləmək üçün futbolçularımla birlikdə əlimizdən gələni edəcəyik”.
