ETOPAZ 
“Qarabağ”dan böyükhesablı əzmkar qələbə
“Qarabağ” növbəti avrokubok oyununu keçirib. Azərbaycan Premyer Liqasının vitse-çempionu Konfrans Liqasının qrup mərhələsində ikinci oyununa çıxıb.
Ağdam təmsilçisi II turda Kipr “Omoniya”sının qonağı olub. Qurban Qurbanovun yetirmələri qrupdakı ilk səfər matçında məğlub duruma düşsə də, əzmkar qələbə qazanıb. İlk yarıda buraxılan qolun əvəzini fasilədən sonra artıqlaması ilə çıxan “Qarabağ” böyükhesablı qələbə qazanıb – 4:1. Təmsilçimizin qollarına dubl müəllifi olan Kadi Borqes, həmçinin Ramil Şeydayev və penaltini dəqiq yerinə yetirən Maksim Medvedev imza atıb.
Qrupun digər qarşılaşmasında “Bazel” İsveçrədə Qazaxıstan “Kayrat”ını qəbul edib. Meydan sahibləri bu görüşdə 4:2 hesablı qələbə qazanıb.
II turdan sonra “Qarabağ”la “Bazel” H qrupunun şərikli liderləridir. Hər iki komandanın 4 xalı var. “Kayrat”la “Omoniya” hərəyə 1 xal toplayıb.
Xatırladaq ki, oktyabrın 21-də keçiriləcək III turda “Qarabağ” “Kayrat”ı, “Bazel” “Omoniya”nı qəbul edəcək.
