“Qarabağ”dan ardıcıl 3-cü qələbə və 3 rekord
“Qarabağ” Azərbaycan futbolu tarixində 3 rekorda imza atıb. Ağdam təmsilçisi qrupdakı qələbə, xal və qol sayında rekord əldə edib.
Konfrans Liqasının IV turunun “Kayrat”la səfər oyununda 2:1 hesabı ilə qalib gələn Qurban Qurbanovun yetirmələri qrupda ardıcıl 3-cü qələbəsini qazanıb. İndiyədək heç bir Azərbaycan klubu əsas mərhələdə bu qədər matçda rəqibini məğlub etməyib.
“Qarabağ” bununla da xal hesabını 10-a çatdırıb. Bu, Azərbaycan klubları üçün mütləq rekorddur. Hər iki göstəricidə əvvəlki rekord 2016/17 mövsümünə təsadüf edib. Həmin vaxt Avropa Liqasında 2 qələbə qazanan ağdamlılar qrupu 7 xalla tamamlayıb.
“Qarabağ” qrupdakı məhsuldarlıq rekordunu da təkrarlayıb. 2019/20 mövsümündə Avropa Liqasının qrupunda 8 qol vuran Qurbanovun komandası yenə 8 dəfə rəqib qapılarına yol tapıb. Amma mütləq rekord üçün qarşıda daha iki görüş var.