ETOPAZ 
“Neftçi”dən qələbə, Sumqayıtda qolsuz heç-heçə
Azərbaycan Premyer Liqasında V tura yekun vurulub. Turun son günündə iki oyun keçirilib.
“Sabah” öz meydanında “Neftçi”ni qəbul edib. Son çempion 2:1 hesablı səfər qələbəsi qazanıb. “Ağ-Qaralar”ın heyətində 21-ci dəqiqədə Ramon Maçado, 77-ci dəqiqədə Mamadu Kane fərqlənib. Meydan sahiblərinin təsəlli qoluna Aleksey İsayev imza atıb. O, buraxılan ikinci topdan 4 dəqiqə sonra rəqib qapısına yol tapıb. Bu qələbədən sonra “Neftçi” 10 xalla 3-cü, “Sabah” 1 xalla 7-ci yerdə qərarlaşıb.
Turun son qarşılaşmasında “Sumqayıt” “Qəbələ”ni qəbul edib. Qarşılıqlı hücumlarla keçən görüş qolsuz heç-heçə ilə başa çatıb. Bu nəticələrdən sonra “Qəbələ” xal hesabını 11-ə çatdırıb və liderliyini qaytarıb. “Sumqayıt”ın aktivində 7 xalla 5-ci sıraya yüksəlib.
Xatırladaq ki, turun ilk günündə “Keşlə” – “Qarabağ” (1:1) və “Səbail” – “Zirə” (1:2) oyunları keçirilib.
