ETOPAZ 
Avrokubokların final matçlarının hakimləri açıqlandı
Avrokubokların 2021/22 mövsümünün final oyunlarının hakimləri bəlli olub. Bunu UEFA-nın mətbuat xidməti açıqlayıb.
Çempionlar Liqasının “Liverpul” – “Real” görüşünü fransalı hakimlər briqadası idarə edəcək. Baş hakim Kleman Türpinə yan xətt hakimləri kimi Nikolya Danos və Siril Qrinqor kömək edəcəklər. Dördüncü hakim funksiyasını isə Benua Bastyen yerinə yetirəcək. Fransanın paytaxtı Parisdəki “Stad de Frans” stadionunda keçiriləcək qarşılaşma mayın 28-də baş tutacaq.
Avropa Liqasının “Ayntraxt” – “Reyncers” qarşılaşması sloveniyalı hakimlər briqadasına tapşırılıb. Baş hakim Slavko Vinçiç, yan xətt hakimləri Tomaj Klançnik və Andraj Kovaçiç, dördüncü referi isə serbiyalı Srcan Yovanoviç olacaq. Sevilya şəhərindəki “Ramon Sançes Pisxuan” stadionunda keçiriləcək oyun mayın 18-də təşkil olunacaq.
Konfrans Liqasının “Roma” – “Feyenoord” oyununda rumıniyalı ədalət təmsilçiləri iş başında olacaq. Baş hakim İştvan Kovaça yan xətt hakimləri Vasile Florin Marinesku və Mixay-Ovidiu Artene kömək edəcəklər. Dördüncü hakim vəzifəsini isə isveçrəli Sandro Şerer yerinə yetirəcək. Albaniyanın paytaxtı Tiranadakı Milli Arenada oynanılacaq görüş mayın 25-də keçiriləcək.
