ETOPAZ 
Cokoviç yenidən finalda
Paris-2024 Yay Olimpiya Oyunlarında tennis yarışları başa çatmaq üzrədir. Artıq kişilərin mübarizəsində ilk finalçının adına aydınlıq gəlib.
Novak Cokoviç 4-cü cəhdində olimpiadanın finalına yüksələ bilib. O, bundan əvvəl 3 dəfə yarımfinalda mübarizəni dayandırıb. Cokoviç Pekin-2008, London-2012 və Tokio-2020 turnirlərində finalın bir addımlığında uduzub. Novak bu dəfə Lorenso Muzettini (İtaliya) 6:4 və 6:2 hesablı setlərlə məğlub edib.
Cokoviç olimpiadalar tarixində finala yüksələn ən yaşlı tennisçi olub. Novak finalda ispaniyalı Karlos Alkarasla qarşılaşacaq. Bu tennisçilər iyulun 14-də Uimbildon Open-2024-ün finalında üz-üzə gəliblər və Alkaras 3:0 hesabı ilə qalib gəlib.
Qeyd edək ki, 37 yaşlı idmançı 24 dəfə “Böyük Dəbilqə” yarışlarının qalibi olub. Onun medal kolleksiyasında yalnız Olimpiya qızılı çatışmır.
