ETOPAZ 
Canni de Byazi: “Futbolda mümkün olmayan bir şey yoxdur”
Azərbaycan milli komandası sabah Latviya ilə yoldaşlıq oyunu keçirəcək. Maltada baş tutacaq qarşılaşma ərəfəsində baş məşqçi Canni de Byazinin mətbuat konfransı keçirilib. İtaliyalı mütəxəssis sabahkı görüş barədə fikirlərini açıqlayıb:
“Maltaya qarşı keçirdiyimiz oyuna görə narahat idim. Əminəm ki, yığmamız daha yaxşı oyun göstərə bilər. Sabah da bunu göstərməliyik. İlk növbədə özümüzə inanmalı və taktiki baxımdan inkişaf etməli idik. Malta önündə taktiki problemlərimiz oldu. Futbolçularla bu barədə danışdım. İki məşq keçməyimizin də buna təsiri oldu Əgər yaxşı oyun göstərsək, futbolçular öz mövqelərində bacardıqlarını edə bilsələr, nəticə qazanmaq mümkün olar. Nə zaman yaxşı oynasaq, topla rahat davransaq, bir-birimizi meydanda dəstəkləsək, hər bir rəqibə qarşı oynaya bilərik. Futbolda mümkün olmayan bir şey yoxdur. Reytinqdə 67-ci pillədə olan Şimali Makedoniya İtaliyaya qalib gəldi. Bunun üçün ən əsası özümüzə inanmalıyıq”.
Yığmamızın kapitanı Maksim Medvedev də konfransda iştirak edib. Müdafiəçi Maltaya 0:1 hesablı məğlubiyyətdən danışıb:
“Malta ilə görüşdə fərqli oyun sistemində çıxış etdik. Məşqdəki proqramı meydanda tətbiq etmək çətindir. Bəzən futbolçu meydanda bilmir nə etsin. Mən də komandama kömək etmək istəyirəm. Bəzən oyunçular baş məşqçinin tapşırıqlarını yerinə yetirməyəndə xaos yaranır. Heç kim belə vəziyyətin yaranmasını istəməzdi. Biz Maltadan daha yaxşı komandayıq. Amma onlara qarşı iki nömrə kimi oynadıq. Bu özü mənə pis təsir etdi. Halbuki fiziki və texniki cəhətdən Maltadan yaxşı idik. Sırf kollektiv oyun baxımından bizi qabaqladılar. Psixoloji cəhətdən hazırlıqsızlıq ola bilər. Bəzi oyunçular sosial şəbəkəni izləyirlər, kimsə nəsə yazanda ona pis təsir edir. Malta elə komandadır ki, rahat oynasaq, onlara 2-3 qol vurarıq. Uşaqlar gərək sosial medianı az izləsinlər. Daim 90 dəqiqəni eyni tempdə oynamaq lazımdır”.
